ఆంధ్రప్రదేశ్ లో కొత్త జిల్లాల ప్రాతిపదికన ఉద్యోగ నియామక నిబంధనలు

         ఆంధ్రప్రదేశ్ రాష్ట్రంలో 26 జిల్లాల ప్రాతిపదికన ఉద్యోగ నియామకాలు చేపట్టేందుకు ప్రభుత్వం సిద్ధమవుతోంది. కేంద్ర ప్రభుత్వం జారీ చేసిన 'ఏపీ పబ్లిక్ ఎంప్లాయిమెంట్ ఆర్డర్-2025 కు అనుగుణంగా రాష్ట్ర గెజిట్ వెలువడనుంది. ఈ కొత్త నిబంధనల వల్ల గతంలో ఉన్న 1975 నాటి పబ్లిక్ ఎంప్లాయిమెంట్ ఆర్డర్ రద్దు కానుంది. దీనిపై ఈ నెల 10న జరిగే మంత్రివర్గ సమావేశంలో తుది నిర్ణయం తీసుకోనున్నారు.

 

1.   ముఖ్యమైన మార్పులు మరియు కోటాలు

• స్థానిక రిజర్వేషన్లు: ఇకపై అన్ని స్థాయిల ప్రత్యక్ష నియామకాల్లో స్థానిక అభ్యర్థులకు 95% కోటా ఉంటుంది.
• స్థానికేతర కోటా: మిగిలిన 5% పోస్టులను స్థానికేతర అభ్యర్థుల కోసం కేటాయిస్తారు.
• నియామక వ్యవస్థ: రాష్ట్రవ్యాప్తంగా 6 జోన్లు మరియు 2 మల్టీ జోన్లు అమలులోకి రానున్నాయి.
• రాష్ట్ర స్థాయి పోస్టులు: గతంలో రాష్ట్ర స్థాయి పోస్టులుగా పరిగణించిన వాటిని ఇప్పుడు మల్టీ జోన్ పరిధిలోకి తీసుకువచ్చారు.

 

2.    పోస్టుల వర్గీకరణ (Cadres): ఉద్యోగ స్థాయిని బట్టి పోస్టులను మూడు విభాగాలుగా విభజించారు -

1. జిల్లా స్థాయి: జూనియర్ అసిస్టెంట్ మరియు దాని కంటే తక్కువ స్థాయి పోస్టులు. ఎస్జీటీ, స్కూల్ అసిస్టెంట్ మరియు గ్రేడ్-2 హెడ్ మాస్టర్ పోస్టులు కూడా జిల్లా క్యాడర్ కిందకే వస్తాయి.
2. జోనల్ స్థాయి: సూపరింటెండెంట్ మరియు మొదటి స్థాయి గెజిటెడ్ పోస్టులు ఈ విభాగంలో ఉంటాయి.
3. మల్టీ జోన్ స్థాయి: డిప్యూటీ కలెక్టర్ మరియు దానికి సమానమైన ఉన్నత స్థాయి గెజిటెడ్ పోస్టులు దీని పరిధిలోకి వస్తాయి.

 

3.   స్థానికత (Local Status) గుర్తింపు నిబంధనలు

• విద్యాభ్యాసం: ఒక పోస్టుకు నిర్ణయించిన విద్యార్హత కంటే ముందు ఏడేళ్ల కాలంలో, కనీసం నాలుగేళ్లు ఎక్కడ చదివితే ఆ ప్రాంతాన్ని స్థానికతగా గుర్తిస్తారు. వరుసగా ఏడేళ్లు ఏ ప్రాంతంలోనూ చదవకపోతే రాష్ట్రంలోని నివాస ప్రాంతాన్ని పరిగణనలోకి తీసుకుంటారు.
• చదువుకోని వారు: విద్యార్హత అవసరం లేని పోస్టులకైతే నివాస ధ్రువీకరణ పత్రాన్ని ప్రామాణికంగా తీసుకుంటారు.
• ప్రత్యేక విద్యార్థులు: అంధత్వం లేదా వినికిడి లోపం ఉన్న వారు ప్రత్యేక పాఠశాలల్లో చదివినట్లయితే, వారి తల్లిదండ్రుల నివాస ప్రాంతాన్ని స్థానికతగా పరిగణిస్తారు.

 

4.   మల్టీ జోన్ల వారీగా జిల్లాల వివరాలు:

 

మల్టీ జోన్	జోన్	పరిధిలోకి వచ్చే జిల్లాలు
మల్టీ జోన్-1	1	శ్రీకాకుళం, విజయనగరం, పార్వతీపురం మన్యం, విశాఖపట్నం, అనకాపల్లి
	2	అల్లూరి సీతారామరాజు, తూర్పుగోదావరి, కాకినాడ, డాక్టర్ బీఆర్ అంబేద్కర్ కోనసీమ
	3	పశ్చిమ గోదావరి, ఏలూరు, ఎన్టీఆర్, కృష్ణ
మల్టీ జోన్-2	4	గుంటూరు, పల్నాడు, బాపట్ల, ప్రకాశం, ఎస్పీఎస్ఆర్ నెల్లూరు
	5	తిరుపతి, చిత్తూరు, అన్నమయ్య, వైఎస్సార్ కడప
	6	నంద్యాల, అనంతపురం, కర్నూలు, శ్రీసత్యసాయి